1

Hum nay her haal mein os ko he muqaddam rakha

Khushi mein bhoolay na gham mein koi maatam rakha

Kaun kehta hai keh zulmat thy shab-e-furqat mein

Hum nay shamma ke tarha aankh ko bhi nam rakha

Hijr kay zakham to ek aan mein bhar jaeen gay

Tu nay jo wasl mein guftaar ka marham rakha

Sar yeh kat'ta hai to kat jaye rah-e-ulfat mein

Hum nay ooncha he beharhaal yeh parcham rakha

Ahal-e-fan likhtay rahay khoon say zamanay kay sitam

Shehar-e-baydard nay dil waalon ko mujrim rakha

_______________________________________________

2

Jab dagha apnay sitaaray he hamein dainay lagay

Hum bisaat-e-waqt kay piyaadon say bhi pitnay lagay

Bujh na jaye aankh say jalta sitara bhi kahein

Is liye hum raat kay her taak mein jalnay lagay

Ehad woh jo patharon pe hum nay likhay thay kabhi

Waqt ke aandhi say zarron ke tarha ornay lagay

Jo muqabil tha safoon mein woh mera humzaad tha

Os say larnay bhi lagay aur khud say bhi bachnay lagay

Jab piyaalay mein na otri chand ke koi kiran

Hum to raaton mein sharab-e-teergi peenay lagay

_______________________________________________

3

Na saleeqa hai na izhaar ke taqat mujh mein

Bas kisi naam ke likhi hai ibarat mujh mein

Choom laita hoon jahaan paoon bhi woh rakhta hai

Aur koi bhi nahi yara karamat mujh mein

Meherbaan ho ya kabhi ho woh khafa he mujh say

Rehti her haal mein hai os ke ata'at mujh mein

Kar kay band aankhein main kar laita hoon baatein khud say

Aaina daikhnay ke bhi nahi taqat mujh mein

Siskiyaan sonta hoon din raat main apnay ander

Kaun karta hai yeh ro ro kay ibadat mujh mein

_______________________________________________

4

Veeraniyoon kay khauf say hansna para mujhey

Banjar zamein bhi khil othay rona para mujhey

Sheesha garoon kay shehar mein suraj thay her taraf

Saye ko lay kay saath he jalna para mujhey

Sagar say aashna tha na toofan say aashna

Her mauj-e-tund khaiz say larna para mujhey

Gul kar na day hawa-e-zamana so aay Khuda

Dil ko jala kay seenay mein rakhna para mujhey

Duniya say jhuknay wala to lagta nahi Ebad

Hai aur koi daikhta, Darna para mujhey

_______________________________________________

5

Aay watan teri mohabbat mera juzv emaan

Dil kay aayene meein rehta hai tera aks ayaan

Duur reh kar bhi tu rehta hai khayaalon peh sawaar

Aankh roti hai tera naam jo laiti hai zabaan

Teri izzat, teri shohrat, teri khushiyaan hain aziz

Teray parcham kay haseen chand peh jaoon qurbaan

Meri pehchan meri aan meri shaan hai tu

meray ash'aar mein pinhaan hain tera zikr-o-biyaan

Teri rag rag mein shaheedon ka lahu daurta hai

On ke khushboo teri is khaak mein hai ab bhi ravaan

Apnay haathon say jareen is ke na kaato logo

Muddaton ashk bahaye to hoe fasal javaan

Aao sab mil kay dua kartay hain Malik kay hazoor

Ta-qayamat rahay duniya mein tera naam-o-nishaan

_______________________________________________

6

Dariya charhay to kashti ko kab badbaan milay

Mausam badal gaye to kae meharbaan milay

Tanha othani parti hai ab dard ke saleeb

Is daur mein kisi ko Maseeha kahaan milay

Darta hai ab to aadmi apnay he saye say

Suraj say dost pusht kay ander nehaan milay

Gardish ke dhoop chaat gaye husn zaat ka

Mehloon mein basnay walay bhi bay-khanmaan milay

Daitay hain woh to dars-e-shakibaaye aaj bhi

Dast-e-hunar say jin ke hamein kisht-e-jaan milay

_______________________________________________

7

Day gaya kaun ye phir zakham-e-shanasai mujhey

Dasht-e-ghurbat mein bhi chooray ge na rusvaai mujhey

Ajnabi miltay hain raahon mein bichar jaatay hain

Qaaflay dard kay day jaatay hain tanhai mujhey

Umar bhar jaagti hain aankhein sitaaray gintay

Karni parti hai siyaah raaton ke sehraai mujhey

seel-e-toofan kay bhanwar say abhi niklay bhi na thay

Kahein lay doobay na phir dil ke ye dariyaae mujhey

Garam mausam mein rakhein aag kay dil per phahay

Phoonk daalay na kahein aaisi Maseehai mujhey

_______________________________________________

8

Toota hon kitni baar main, ginta nahi hoon ab

Chooro meray wajuud ko, jurta nahi hoon ab

Likha hai itni baar main nay khuwaab ko azaab

Kaisa bhi koi khuwaab ho darta nahi hoon ab

Maarein ge ab yeh kiya mujhey nafrat ke barchiyaan

Maara hai itni baar ke marta nahi hoon ab

Aati hai baar baar hawa mujh say cheen'nay

Khushboo main apnay dard ke daita nahi hoon ab

Aayene mein ab to saaray he chehray hain ajnabi

Tu kaun hai main kaun hoon kehta nahi hoon ab

Shaiyad main munkashif na hoa apni zaat say

Likhta hoon saari raat main soota nahi hoon ab

Pohanchay ge dil ke cheekh kabhi aasmaan talak

Rakhta hoon sar zameen pe, khulta nahi hoon ab

Phoonkay na koi kaan mein Ebad aa kay soor

Pathar ka ho gaya hoon main sonta nahi hoon ab

_________________________________________________

9

Meri dastaras mein na thy hawa jo bikhar gaya to malaal kiya

Yeh jo phool jharnay hoon pair kay to karay woh naaz-o-jamaal kiya

Janay kab say gathri musafrat ke otha kay hoon main chala hoa

Mujhey hoosh kab tha keh janta yeh guzar gaye mah-o-saal kiya

Rang-e-jaan say khoon ko nichoor kar aay shoreeda sar tujhey kiya mila

Na chaman khila na Khuda mila to riyaazaton ka kamaal kiya

Tu nay zaviya he badal diya meri sooch ka dil-e-baymehar

Ab ghaur karna hai wasl kiya ab soochna hai wisaal kiya

Nahi shauq zakham numaai ka yeh safar hai aabla paye ka

Kisay kiya bataaon keh yeh jahaan bana karbala hoa haal kiya

Main to khud hon apni talaash mein mujhey shohraton ke talab nahi

Mujhey kiya khabar keh arooj kiya mujhey kiya pata keh zawaal kiya

Kunj-e-aasman mein chupa liya kia tang zamein nay jab mujhey

Daikhein ab kay waqt ke taigh phir chalti hai apni yeh chaal kia

__________________________________________________

10

Mujh say nafrat ya piyaar kar laitay

Silsila kuch to yaar kar laitay

Baat karna giraan tha itna agar

Khud pe taari khumaar kar laitay

Dhoop gar thy to zulf-e-janaa ka

Saya he musteaar kar laitay

Jab muqaddar mein hijratein hain likhein

Zaad-e-raah chash-e-yaar kar laitay

Teray khuwaabon ko woh saja daita

Yaad jo aik baar kar laitay

Hum ko miltay hain zakham rooz naye

In ko kaisay shumaar kar laitay

Apnay zakhmoon ko taazgi day kar

Intezaam-e-bahaar kar laitay

Milti jo teri yaad ke kashti

Behar-e-gham hans kay paar kar laitay

Darguzar woh Ebad kar daita

Aankh jo Ashkbaar kar laitay

_________________________________________________

11

Aag say guzra hoon kundan ka irada lay kar

Jaoon ga dasht mein sawan ka libada lay kar

Khushboeen qaid mein rakhna nahi aaya mujh ko

Fasl-e-gul aaon ga main sehan kushada lay kar

Mujh ko matlab teray deedar say he, may say nahi

Tum chalay aao faqat aankh ka badah lay kar

Toor aaya hoon main teray liye saaray rishtay

Ghar say nikla hoon main tanhaai ka jadah lay kar

Choor jatay hain yahaan daagh he dil per rishtay

Paas aaon teray kaisay dil-e-sada lay kar

Na he khud pe ho yaqeen aur na he Khuda per jis ko

Kiya karay ga woh faqat khaali irada lay kar

Maat to de hai zamanay nay Sikandar ko Ebad

Aur tum baithay ho bas aik piyaadah lay kar

________________________________________________

12

Sehra ko mujhey phoolon say bharnay ka janoon hai

Nafrat ko mohabbat mein badalnay ka janoon hai

Zulmaat kay sagar mein koi chand hai baychain

Ek roshni hai jis ko nikharnay ka janoon hai

Gum sum hai khara sooch mein sadiyoon say yeh insaan

Main kaun hoon woh kiya hai samajhnay ka janoon hai

Dildari-e-gham kis say karay koi jahaan mein

Her shakhs ko to aag peh chalnay ka janoon hai

Ek yaad hai jo paoon ke zanjeer bani hai

Ek dil bhi hai jis ko keh tarapnay ka janoon hai

Hansta hoon kabhi khul kay to lagta hai badan kay

Zindaan say ab mujh ko nikalnay ka janoon hai

Dar jata hoon karta hai jo parvaaz takhaiyul

Yeh kaisa mujhey waqt ko parhnay ka janoon hai

Parhtay na samajhtay na he sontay hain yeh pathar

Phir bhi mujhey deewaron peh likhnay ka janoon hai

Soeen nahi muddat say yeh jalti hoe aankhein

Woh kaun hai jis say inhein milnay ka janoon hai

________________________________________________

13

Ghool kar gham sharaab lay aao

Karb hai bayhisaab lay aao

Aaj chairoon ga gham kay taaron ko

Koi zakhmi rubab lay aao

Hum nashay mein sawaal poochein gay

Hoosh walo jawaab lay aao

Hum bhi apnay gunah laye hain

Tum bhi apnay sawaab lay aao

Hum to sehra otha kay laye hain

Rah mein tum saraab lay aao

Ek samander hai apnay seenay mein

Phir wohi mahtaab lay aao

Kioon sakoon mein rahay dil-e-muztir

Ek naya iztaraab lay aao

Qarz saaray otaar day ga Ebad

Sab hisaab-o-kitaab lay aao

_________________________________________________

14

Meri Tanhai Yeh Sawaal Kar

Yeh meray ander kay zard pattay

Bachasham-e-tar jo lipat kay daikhay hain Shaakh-e-gul ko

Mujhey yaqeen hai kisi naveed-e-sehar ke chaapon kay muntazir hain

Woh kaun hai jis kay dukh ko dil mein liye hoe yeh

Siyaah raaton kay tanha gooshon mein apnay dil ko jala jala kar

Zameen pe taaray saja saja kay

Kisi kay daman mein chandni ke haseen kirnoon kay muntazir hon

Yeh kaun hai jo khizaan raseeda say mausamoon mein nawaazta hai

Gae bahaaron ko bhaijta hai yeh kaun hai, jis ko main nay soocha

To gham kay badal bhi chutt gaye hain

Meri duaeen, hawaeen ban kar siyaah badal hata rahi hain

Yeh kaun hai, Jis ke muskurahat say shaamein roshan hon aik pal

Mein ochal paray aik seel-e-anjum udaas raaton ke teergi mein

Woh kaun hai jis kay ek tasavvur say gungunaati hain meri raatein

Woh kis ke yaadon ke loriyoon say mujhey sulaati hain meri raatein

Woh kaun hai jis ko soochta hon

Woh kaun hai, yeh batao mujh ko

__________________________________________________

15

Her aik khuwahish-e-zinda ko maarna hai hamein

Likha gaya hai keh pardees kaatna hai hamein

Galay mein tauq-e-judaai bhi ab pehan'na hai

Saleeb-e-waqt peh rishtoon ko taankna hai hamein

Lipat kay roona hai ab saari umer yaadon say

Gali mein maazi ke ab dar kay jhaankna hai hamein

Sona hai hijar ke raatein taveel hoti hain

Sitaaray aankh mein rakh kar he jaagna hai hamein

Jo gham ke aag sulagti hai apnay seenay mein

Isi say sard se raatein guzaarna hai hamein

Yeh hijratoon ka safar bamuraad kab ho ga

Yeh soochna hai hamein ab yeh jaan'na hai hamein

Yeh dasht hai yahaan imkaan nahi hai dariya ka

Isi saraab say paani nikaalna hai hamein

Ghari bohat he kuthan hai yeh zindagi ke Ebad

Shikasta kashti mein toofan ka saamna hai hamein

_________________________________________________

16

Pakistan Kehta Hai

Kia kia meray naseeb kay manzar hain in dinoon

Her rah per azaab kay pathar hain in dinoon

Hum dono woh hain jin ka koi ant he nahi

Sehra hoon main to woh bhi samander hain in dinoon

Muddat say dairay daalay hoe hain bala-e-shab

Deewar-o-dar say liptay hoe darr hain in dinoon

Apna naseeb apnay he haathon say nooch kar

Baithay hain shaakh-e-yaas pe, bay-par hain in dinoon

Bay-mehar ho gae hain hawa ke rifaaqatein

Phoolon kay saath saath bhi nishtar hain in donoon

Kaisay kahoon ke in ko Khuda per yaqeen hai

Sajday karay jo ghair ko bhi sar hain in dinoon

Niklay thay kab watan say hamein yaad ab kahaan

Hijrat naseeb loog hum, bayghar hain in dinoon

________________________________________________

17

Main naqsh-e-dasht hoon mujh ko sambhaalna kaisa

Hawa ke zad pe hoon rehta sanwaarna kaisa

Fana kay baad fana phir fana phir aur fana

Yeh zindagi hai to phir rang ochaalna kaisa

Jafa ka daur hai qatil to apnay saye banay

Adu nay seenay mein khanjar otaarna kaisa

Yeh mehar-o-meh ke tamanna koi saraab nahi

Safar mein thak kay garebaan ko phaarna kaisa

Main roshni mein tumhari naha kay kiya loon ga

Jo sona ho chuka kundan, ojaalna kaisa

Yeh shehar-e-sang hai aur kaanch ka makaan mera

To phir kisi ko madad ko pukaarna kaisa

_______________________________________________

18

Koocha-o-bazaar mein tanha he sab phirtay rahay

Jism-o-jaan khoe rahay aur peerhan miltay rahay

Aashiyaan bhi rafta rafta maqbaroon mein dhal gaye

Baam-o-dar ke khaamshi say saye bhi dartay rahay

Badnaseebi, is tarha khaati hai hariyaali kay khait

Jis tarha barish ko pee kar dasht yeh jaltay rahay

Kar saki tabdeel kab koi qayamat bhi mizaaj

Zindagi kay kaam to her haal mein chaltay rahay

Kaun thay aur kis jagah kay loog thay jo keh hameesh

Zakham khaatay khaatay bhi dil say dua daitay rahay

Koi to rakhay ga marham, dhoondiye ja kar Ebad

Aanay wala hai Maseeha kab say yeh sontay rahay

_______________________________________________

19

Jo apni daar say bichray hain kuch zikr karo on yaaron ka

On bhooli basri yaadon ka, on galiyoon aur deewaron ka

Kiya ab bhi rait kay teelon pe hain roshan deep mohabbat kay

Kiya ab bhi os ja rukta hai koi qaafla ishq kay maaron ka

Kiya ab bhi raat kay aangan mein waan chandni khailnay aati hai

Kiya ab meela lagta hai waan bichray chand sitaaron ka

Kiya ab bhi khushboo phoolon ke os dhoop mein nasha bharti hai

Kiya ab bhi jaam chalakta hai on khiltay hoe gulzaaron ka

Aay dais say aanay walay teray chehray pe sab kuch likha hai

Kiya haal chupaye chupta hai hans dainay say dukhiyaaron ka

Haan ab bhi raaj singhaasan per hai qabza zalim loogon ka

Haan ab bhi sikka chalta hai on zulmat kay sardaaron ka

Haan ab bhi qismat hijrat hai os dais mein qaum parastoon ke

Haan ab bhi dhaya jaata hai ghar dais kay he meemaron ka

Hum roshniyoon kay pekar hain hamein choro taiz hawaaon mein

Hum jal jaeen to tootay ga pindaar inhi andhiyaaron ka

_________________________________________________

20

Kaisi aankhon ko hamari yeh saza daitay hain

Khuwaab her rooz diye in mein jala daitay hain

Itni umeedein na wabasta karo hergiz tum

Chand jhoonkay yeh diye pal mein bujha daitay hain

Yaad rakhta hai yahaan kaun puraanay rishtay

Gard par jaye to pehchan bhula daitay hain

Khoon mein doob gaye phir koi hansti basti

Rooz khabroon mein naye laashay dikha daitay hain

Kitnay bay'his hain naye daur kay insaan ya Rab

Shehar kay shehar yeh lamhoon mein jala daitay hain

Hum he badlein gay zamanay ka yeh zalim, chehra

Likh kay tum rakh lo kitaabon mein, bata daitay hain

_________________________________________________

21

Apnay honay ka kuch pata daitya

Kuch na kuch zakham he laga daitay

Dar tha tujh ko agar zamanay ka

Piyaar aankhon say he dikha daitay

Bay-sabab ghair say kaha tum nay

Apnay haathon say he saza daitay

Zindagi to teri amanat thy

Teray charnoon mein hum bita daitay

Kat he jaatay udaas say lamhay

Tum jo khuwaabon ka aasra daitay

Ho he jaatein amar meri ghazlein

Tum jo masti mein gunguna daitay

________________________________________________

22

Jo apnay aap say nikloon to os ko ja kay miloon

Mera to chehra he gum hai main kiya dikha kay miloon

Ghubaar-e-zaat mein to chup gaye hain manzar sab

Jo is pe barishein barsein to main naha kay miloon

Andheri raat mein dil chahay os kay dar pe main

Koi dua ka diya aankh mein jala kay miloon

Main os ke raah mein kashkool rakh doon sab apnay

Woh badshah main gadagar hon is ada say miloon

Kabhi to mujh pe ho tu aa kay meharbaan aay hayaat

Kabhi tujhey bhi khushi say galay laga kay miloon

________________________________________________

23

Os ke yaadon ke her ek shab mein riyazat ke hai

Osay chaha he nahi os ke ebadat ke hai

Mujh ko hai naaz keh shab-khoon na mara main nay

Main nay her haal mein dushman say diyanat ke hai

Aik pattay ka bhi saya na shajar say nikla

Zard mausam ke hawaaon nay adawat ke hai

Aablay phoot kay rootay hain meray paoon kay

Yoon meray zabt say ashkoon nay baghavat ke hai

Thak kay aashufta-sari soye thy ek pal kay liye

Phir teray khuwaab nay woh pehlay se halat ke hai

Kaisay shikwa karay ghairoon say bhala koi Ebad

Apnay haathon say he khud apni jarahat ke hai

________________________________________________

**********